Përkufizim. Funksioni numerik f që si bashkësi përcaktimi ka bashkësinë e numrave natyrorë N ose bashkësinë e k numrave të parë natyrorë, quhet varg numerik.

Vlerat e këtij funksioni quhen kufiza të vargut.

Në rast se bashkësia e përcaktimit e vargut numerik është N, ai quhet varg numerik i pafundëm. Në rast se bashkësia e përcaktimit të vargut numerik është bashkësia e disa numrave të parë natyrorë, atëherë vargu quhet i fundëm.

Kufizën e vargut f, që i përgjigjet numrit 1 e shënojmë me y₁. Pra: y₁=f(1).

Kufizën e vargut f, që i përgjigjet numrit 2 e shënojmë me y₂; y₂ = f(2).

Kufizën e vargut f, që i përgjigjet numrit n e shënojmë me  y_n ; y_n = f(n).

Kufizat e një vargu numerik i shkruajmë në një radhitje plotësisht të përcaktuar, sipas radhitjes që kanë treguesit e tyre në vargun e numrave natyrorë:

y₁ , y₂ , …, y_n , … d.m.th f(1), f(2), …., f(n), …

Kur vargu numerik y=f(x), x∈N apo y=f(x), x∈{1,2,3, ….., k} e shkruajmë në rradhitjen y₁ , y₂ , …, y_n , …, treguesi n i kufizës y_n , s’është gjë tjetër vecse vlera e ndryshorit x (x=n), kurse vete kufiza y_n  përfaqëson vlerën përgjegjëse të funksionit. Ky varg shpesh shënohet si (y_n ) ku y_n  =f(n).

Vargu numerik mund të jepet me anën e një formule y=f(x), x∈N apo y(x), x∈{1,2,3, ….., k} që na lejon të gjejmë cdo kufizë të tij. Një formulë e tillë shkruhet shpesh kështu:

y_n  =f(n), x∈N apo y_n  =f(n), n∈ {1,2,3, ….., k}

Përkufizim. Formula që shpreh cdo kufizë të vargut nëpërmjet treguesit të saj n, quhet formulë e kufizës së përgjithshme të vargut.